កីឡា ១១ ប្រភេទត្រៀមសម្រាប់បុណ្យទន្លេចុងសប្តាហ៍នេះ
09-March-2016 | ដោយ មែន កំសត់
ភ្នំពេញ៖ បុណ្យទន្លេលើកទី ២ ដែលជាព្រឹត្តិការណ៍ផ្តោតជាចម្បងទៅលើវិស័យទេសចរណ៍ និងកីឡា ត្រូវបានរាជរដ្ឋាភិបាលព្រះរាជាណាចក្រកម្ពុជាអនុញ្ញាតឲ្យធ្វើឡើងនៅ ចុងសប្តាហ៍នេះ នៅខេត្តកំពង់ចាម ដោយមានចំនួន ៣ ថ្ងៃចាប់ពីថ្ងៃទី ១១ ដល់ទី ១៣ ខែមីនា ឆ្នាំ ២០១៦ ខណៈកីឡាដែលមានប្រិយភាព និងប្លែកៗចំនួន ១១ ប្រភេទ នឹងត្រូវរៀបចំឡើង។
លោកវ៉ាត់ ចំរើន ប្រធានអនុគណៈកម្មការគ្រប់គ្រងកម្មវិធីកីឡានៃបុណ្យទន្លេឆ្នាំ ២០១៦ បានប្រាប់ថា៖ «កម្មវិធីប្រកួតកីឡាចំនួនបីថ្ងៃ ត្រូវបានបែងចែកពេលវេលា និងទីតាំងច្បាស់លាស់រួច ហើយមានកីឡាករចំនួន ១១ ប្រភេទ»។
កីឡារត់ប្រណាំងលក្ខណៈមហាជនបើកទូលាយមិនមែនអាជីព មានអ្នកចូលរួមជាង ១៥០០ នាក់ ភាគច្រើនមកពីសិស្សសាលាមកពីខេត្តកំពង់ចាម និងខេត្តត្បូងឃ្មុំ។ ពេលវេលា និងទីតាំងប្រកួតចាប់ផ្តើម និងទៅដល់ទីបញ្ចប់មុខសាលាខេត្តកំពង់ចាមនៅព្រឹកថ្ងៃសុក្រ ទី ១១ ខែមីនា ឆ្នាំ ២០១៦។
ការប្រកួតបាល់ទះដែលជាព្រឹត្តិការណ៍ទាក់ទាញមួយ មានជម្រើសក្រុមខ្លាំងចំនួន ៥ ក្រុមមកពីទូទាំងប្រទេសដែលរួមមានប៉ូលិស កងអង្គរក្ស ស្វាយរៀង កំពង់ចាម និងព្រះវិហារ ដែលចាប់ពីថ្ងៃទី ១០ ដល់ទី ១៣ ខែមីនា ឆ្នាំ ២០១៦ នៅសាលសាលាខេត្តកំពង់ចាម។
ការប្រកួតកីឡាហែលទឹកមហាជន ដែលមានអ្នកចូលរួមចំនួន ៥០ នាក់ មានរយៈពេលពីរថ្ងៃគឺថ្ងៃទី ១១ និងទី ១២ ខែមីនា នៅមណ្ឌលហែលទឹកតេជោសែនវេលាម៉ោង ៨ ព្រឹក ថ្ងៃសុក្រ និងម៉ោង ៣ រសៀលថ្ងៃសៅរ៍។កីឡាករអុកចត្រង្គចំនួន ៣ ថ្ងៃ មានបេក្ខជនចំនួន ២០ នាក់មកពីខេត្តពីរគឺកំពង់ចាម និងត្បូងឃ្មុំ លេងរាល់ព្រឹកនៅទីលានក្រោយមន្ទីរវប្បធម៌ ក្បែរផ្សាររាត្រី។កីឡាចំបាប់បុរាណ ដែលបើកទូលាយសម្រាប់មហាជន មិនអាចកំណត់ចំនួនបានទេ ប៉ុន្តែ អ្នកចំបាប់អាជីពទៅសម្តែងជាចំបាប់អាជីពចំនួន ៥ នាក់ដែរចំនួន ២ ថ្ងៃនៅថ្ងៃទី ១២ និងទី ១៣ ខែមីនា នៅទីលានក្រោយមន្ទីរវប្បធម៌ ជិតផ្សាររាត្រីដែរ។កីឡាទូកក្តោងសម្តែងនៅទន្លេមុខរូបសំណាកកំពង់រង់ ចាំ ខេត្តកំពង់ចាម ចំនួន ២ ថ្ងៃ ចាប់ពីម៉ោង ៤ រសៀល និង ៥ ល្ងាចនៅទីលានក្រោយមន្ទីរវប្បធម៌ ជិតផ្សាររាត្រី ដែលមានទូក ៥ និងកីឡាករចំនួន ១០ នាក់។
កីឡាសម្តែងលើទឹកមានចំនួន ២ ថ្ងៃគឺសុក្រ និងសៅរ៍ វេលាម៉ោង ៤ រសៀល នៅទីលានក្រោយមន្ទីរវប្បធម៌ ជិតផ្សាររាត្រី មានកីឡាករចំនួន ៣ នាក់។កីឡាទូកប្រពៃណីខ្នាតតូចចំណុះ ១៥ នាក់ មានចំនួន ១៩ ទូក មានកីឡាករចំនួន ២៨៥ នាក់ ហើយនិងប្រកួតរយៈពេលទាំង ៣ ថ្ងៃ។កីឡាឆត្រយោងមានចំនួន ១០ នាក់ លេងរយៈពេល ៣ ថ្ងៃ ដោយចេញពីកោះប៉ែន និងទីប្រារព្ធពិធី។កីឡាសីស្លាប និងសីដក់ លេងរយៈពេលបីថ្ងៃ ចាប់ពីពេលរសៀលនៅទីលានក្រោយមន្ទីរវប្បធម៌ ជិតផ្សាររាត្រី។ ដោយឡែក កីឡាប្រដាល់ក្បាច់បុរាណខ្មែរ នឹងប្រកួតនៅរសៀលថ្ងៃសៅរ៍ ទី ១២ ខែមីនា ឆ្នាំ ២០១៦ នៅទីលានក្រោយមន្ទីរវប្បធម៌ ជិតផ្សាររាត្រីដែលមានគូជាតិ និងអន្តរជាតិសរុបចំនួន ៦ គូ។
ចំពោះសមាសភាពកីឡាករប្រដាល់ រឿង សោភ័ណ្ឌ របស់កម្ពុជា ត្រូវប៉ះជាមួយជើងឯករងមួយថៃ ម៉ាហ្វែ មកពីប្រទេសថៃក្នុងទម្ងន់ ៦៩ គីឡូក្រាម។ម្ចាស់ខ្សែក្រវាត់ពីរស្ថាប័នទេស សំខាន់ មកពីកងពលលេខ ៧០ ប្រកួតជាមួយម្ចាស់ខ្សែក្រវាត់ពីរស្ថាប័នដូចគ្នា ឈិន ក្វាន់ង៉ុយ មកពីមកុដរាជសីហ៍នៃក្រសូងមហាផ្ទៃក្នុងទម្ងន់ ៦៥ គីឡូក្រាម ដែលជាគូសងសឹក។កីឡាករម៉ន ចាន់ដារ៉ា មកពីព្រែកឯងកីឡា ត្រូវប៉ះជាមួយចំណាត់ថ្នាក់លេខ ៣ ខ្សែក្រវាត់ស៊ីម៉ងត៍អូដ្ឋ ឌុម កែវដា ក្នុងទម្ងន់ ៦០ គីឡូក្រាម ដែលជាជាគូសងសឹក។ ម្ចាស់ខ្សែក្រវាត់ K Cement ឆៃ សារ៉ា មកពីក្រសួងការពារជាតិ ត្រូវប្រកួតជាមួយជើងឯករង Black Panther គឺ តក់ សោភ័ណ្ឌ ក្នុងទម្ងន់ ៦៥ គីឡូក្រាម។
អាន សុផល មកពីមិត្តប៉ូលិស ប្រកួតជាមួយអ៊ុង ស៊ីណា មកពីសុភានូមានជ័យ ក្នុងទម្ងន់ ៥៧ គីឡូក្រាម។ខ្លា សរ មកពីក្លិបអេភូថង ប្រកួតជាមួយកីឡាករសំណាង ពិសិដ្ឋ មកពីក្លិបដួងសែនសុខ ក្នុងទម្ងន់ ៦០ គីឡូក្រាម៕
ចំនួនអ្នកទស្សនា
- ថ្ងៃនេះ6961
- ម្សិលមិញ10851
- សប្តាហ៍នេះ73481
- ខែនេះ188631
- ឆ្នាំនេះ188631
- សរុប20631087